പ്രണയാന്തരം

എങ്ങു നിന്നോ വന്ന് ഒന്നിനോടൊന്നു ചേർ -

ന്നൊന്നായ് ഒഴുകുന്നതിന്നു മുൻപേ,

സൂര്യനും ചന്ദ്രനും താരങ്ങളും മണ്ണിൽ

ജീവനും ഉരുവായതിന്നു മുൻപേ,

ഒന്നായ് ലയിച്ചൊരേ താളമായ് രാഗമായ്

ഗാനമായ് നാമൊന്നു ചേർന്നിരുന്നു, അന്നു

സ്വർഗ്ഗവും ചേർന്നിങ്ങു നിന്നിരുന്നു.

ഏഴേഴു ജന്മത്തിനിപ്പുറം ഇന്നു നാം

വീണ്ടും ഒരുമിച്ചു ചേർന്നുവെങ്കിൽ,

ഈയങ്കണത്തിലേക്കിറ്റിറ്റു വീഴുന്ന

നീർമണി നാമായിരുന്നുവെങ്കിൽ,

ഇനിയും ഒരായിരം സംവത്സരങ്ങൾ നീ

എൻ പ്രിയനായിങ്ങു വന്നുവെങ്കിൽ, 

എന്റെയെല്ലാം നീ മാത്രമായ് മാറിയെങ്കിൽ ...