ഓർമ്മച്ചിത്രങ്ങൾ
(എപ്പോഴോ കുറിച്ചിട്ടു. 2022ലെ കല കുവൈറ്റിന്റെ കൈത്തിരിയിൽ ഉൾപ്പെടുത്തിയിട്ടുണ്ട്.)
കാടിൻ നിഴൽ പറ്റി തോടിൻ കരപറ്റി
നീളുന്ന മൺപാതയെങ്ങു പോയി ?
മുപ്പരച്ചൻ മുള്ളു കീറിയ നീറലിൽ
തൊട്ട പുൽനാമ്പുകൾ എങ്ങു പോയി ? മഞ്ഞിൻകണം മാറ്റുകൂട്ടിയ മാലയായ്
മാറിയ മാറാല കാൺമതില്ല.
പുൽച്ചാടിയും പുല്ലുമേയും പശുക്കളും
പാടവും പണ്ടേ മറഞ്ഞു പോയി.
മൂന്നു പതിറ്റാണ്ടു മുമ്പെന്റെ കാലുകൾ
ഇത്ര വേഗത്തിൽ ചലിച്ചതില്ല.
അയലത്തെ വീട്ടിൻ അടുക്കളക്കുള്ളിൽ ഞാ-
നിത്രയും അന്യനായ് മാറിയില്ല.
ലോകവും കാലവും മാറുന്ന വേഗത്തിൻ
കൂടെയെൻ ഗ്രാമവും മാറി വേഗം.
ക്ലോക്കിന്റെ സൂചിപോൽ
ഓർമ്മ തൻ തണ്ടിൽ ഞാൻ
ചുറ്റുന്നു തീരാ പ്രദക്ഷിണമായ് .
No comments:
Post a Comment